Friday, August 03, 2007

الغزو و بدرية احمد و نوابنا......!!!؟


المواضيع المعروضة
  • الغزو العراقي
  • بدرية و الكبتي
  • نواب 2007
تمنيت ان لا ادخل بالسياسة و الكلام الفاضي عنها حتى يكون لي خلق و يصفو الدماغ......!!! لكن مشاهدتي لفقرة معروضة على اليوتوب اثارت تساؤلات و تعليقات اتركها لكم





طبعا اقرب شي لقيته كان المقطع التالي







قثونا الجرايد و الاخبار عن "فنانة" كابسين عليها و لاقينها بشقة و معاها مخدرات و ذكر انه مو اول مرة يمسكون نفس الممثلة بهالقضية، بدرية احمد السحت ام براطم وحدة من بين "ممثلات" الوسط الفني، الي قمنا نقرا اخبارهم بالصفحة الامنية اكثر من الفنية.....!!!؟
راح تسئلوني ليش معطيها اهمية و متعب حالك و معلق، الاجابة هي الاكشن الي صار بينها و بين "ممثلات" الخليج، طبعا الوسط الفني عندنا اثول، و فيه تصنيفات، اول شي كويتيين و الباجي و البدون، الكويتيين ينقسمون لقسمين، رياييل و حريم و قسم مو معروفة مايته اهو سكوب سنتر، لأنه للحين مو قادر افرق بين رياييلهم و حريمهم.......!!!؟

الباجي ينقسمون للموقع الجغرافي مالهم، في الهيلق، و في المصاروة و في نساء غرب آسيا و في الخليجيات و في المتطورين خلقيا و اخلاقيا.....!!!؟

المتطورين خلقيا و اخلاقيا مثل منى عبدالمجيد، الي كانت سحت ما تنبقى و الحين صارت بيتزا سحت ما تنبقى......!!!؟



بدرية احمد تقع في اربع خانات من بينها الخليجيات و الميوتانت، و سوابقها هالجم يوم زايدة، و نقدر نقول انه من بين كل سالفة توصل للجرايد او المجلات اهي لها نصيب محترم، و الكفيل طبعا زميل مهنة، طبعا زميلاتها استشرفوا و طلعت كل شريفة من شريفات روما و لعلعت "طلعوها، قولوا من اهي جمهورنا ما نبي نفقده......!!!"



الي يضحك انه كل مرة يكبسون عليها تقعد اتبجبج و تقول انا انشاء الله راح احج و اسوي عمرة اذا صار عندي فلوس تغنيني عن السرسرة.....!!! يعني اتشرط الهبلة.......!!! عذرها هالمرة شريفة روما بالكبسة الاخيرة انها كانت تبي تضعف و عطوها ربعي حبوب كبيتي، و اهي مسكينة ما تدري كانت تبلعهم و ما تقول شي.....!!!؟

بس ما تنلام، احنا شيوخنا و مجلسنا و حكومتنا يتعاملون معانا بهالطريقة، و اهي لما شافت انه هالاسلوب نفع قالت مع الخيل يا شقرا.....!!!؟

نوابنا البهايم (كلهم بلا استثناء و حتى السعدون) فقرانين ملاعين الخير و مو تارسة عيونهم الانواط الي اتحذف من سمو مكتب سمو رئيس سمو رئيس الوزراء، او السفرات الجهادية لدعم و تثقيف العالم المغيب عن قضايانا و فضايحنا، و لو انه نص النواب البدو طايرين لسوريا او مصر، الا انه علينا ان نقول بأن ربعنا في ما عدا الخرافي راح يقثون العالم كله تقريبا بخرابيطنا........!!!؟

سبعتعش سنة و هم كل مرة يروحون تايلند و طوكيو و فرنسا و هولندا و غيرهم من الدول علشان يبينون قضية اسرانا، و بعد مئات الزيارات نكتشف ان المغاربة ما يعرفون انه للكويت اسرى في العراق، و هذي من تجربة شخصية بعد مناقشة احد المغاربة بموضوع الغزو العراقي......!!!؟

لما يلعبون النواب باهم قضية كويتية، قبل حتى الناقلات و قبل حتى الدستور نفسه،فان المرء منا لا يجد ما يبرد حبده فيهم، فلا التفلع نافع، و لا السب و الحجي نافع معاهم، الحين بعد ما زادت اسعار السلع اشكرة جدامهم و تحت انوفهم و بمباركتهم، ما شفنا شريف واحد فيهم ينط و يقول : "احم... ككاو مارس زاد سعره يا جماعة".......!!! و بعد ما ساوموا الحكومة على المعاشات و القروض، راحوا دبجة و قالوا "عشان عيالنا" زيدوا المعاشات، و زيدوا المخصصات، و كثروا من العطايا و المنح و الصدقات، ما فيكم شريف و تحجى و و قال ليش يا طويل العمر تزيد معاشك للخمسين و تاخذهم مقدم خمس سنين، و ليش يا طويل العمر تاجر المخدرات الي حكمت عليه المحاكم بالمؤبد نايم بداره و لا شنب مقرب صوبه، و ليش و ليش و ليش، ربعنا متخصصين بالتوافه و السخافات و التفنن بالسب.......!!!؟

الامير قط نكتة ذاك اليوم، و الوزرا الله يهداهم ملقوها و هم يعيدون فيها، الكويت بتصير مركز اقتصادي، من وين، خل تصير فيه ديرة اول شي يا الطيبين، هبلتونا و هبلتوا عيالنا من بعدنا، التخطيط صفر، و ربعنا بس يقطون القطة و يبلشون بعض فيها، الحين تدري وزير المالية من الثوارة الي اهو فيها مو مترقعهالنوب تقول له اقلب المحكر قصر، قاعدين تلعبون طرنيب......!!!؟

الغزو بسبتكم، و غلطتكم، و انحشتوا و هديتوا اهلها، و الي كان برة استفاد اكثر من الي كان داخل، و عيالنا ظلوا اسرى لي يومك في منهم ما يندرى وينه، و انتو ما عندكم غير الاسطوانة الي قثيتوا العالم فيها و محد صدقها، اعلام رقلة و طول هالسبعتش سنة و الكل كان يسب و يسفل و يغلط على الكويت و لا قدرنا نواجه الاعلام العراقي و الحملة مالته، و التقدم موجود عندنا بالاسم، و لا شي تطور عندنا، و لو لا انه العالم عيونه مبطلة علينا جان ما حركت شعرة وحدة، الناس مستانسة بالمجمعات و الاسوقة، و صارت الوناسة بالكويت مطاعم و مجمعات، مكتبتنا الوطنية توكم تبدون تسنعون فيها، و منشئات زبالة و ما عندنا انجازات حقيقية، فالحين بس توزعون هالفلوس على الخمة و المتردية و النطيحة، و تعمرون دول و بلدان و احنا عندنا قاعدين بالحر و الخيسة، بالله وين العقل و المنطق، امد كهرباء للعراق، و للمعسكرات الامريكية الي موجودة بارضنا او على الحدود، و انسى المجمعات اليديدة و المباني العالية و اترك عنك زيادة استهلاك المواطنين و المقيمين الي زادوا للمليونين، بدال ما احسب حساب هالشغلة و احط مكاين و ابني محطات و اسنع و اعدل التلفان من القدم، تروح تقط عشر ملايين، و ترز لك جم واحد غالبيتهم بدون، و تخليهم يدقدقون على خلق الله طفوا كهربتكم، و متى بالصيف، انزين، نص الكويتيين برة، و نسبة كبيرة من الاجانب هم تهج، الديرة فاضية لا مدارس مشغلين تكييفها و ذابحين الطلبة و معذبينهم بهالصيف، و لا من مستشفيات، شلون الكهربا صاكة العداد، ليش ابني محطات بالاردن و لبنان و اليمن و باجي الدول، ليش اسوي مطارات حق الناس، ليش تدفع فوق العشرين مليون دينار على قاعة استقبال بالمطار و انت ناوي تغير مكانه خلال اقل من سنتين، ليشمن سبع سنين و انا اقول نفس الكلام و للحين ما تغير شي، ليش الحرامية اهم الي مستانسين، و احنا الي دابلين جبدنا و حارقين اعصابنا، طبعا بينط لي واحد و يقول دام مو عاجبتك ليش ما تذلف، الرد طبعا يا حمار انتوا الي تذلفون و تركوا الديرة و خلوها على خرابها احنا نعدلها و نسنعها خلوها لنا و تركونا نشتغل لها......!!!؟

شكله الضغط ياي

Post a Comment