Sunday, November 18, 2012

تكاسي مصر




تكاسي مصر ما عادتش تحط اغاني!

تكاسي مصر بئت كلها اخوان..
و يحطوا مارشات عسكرية و قرآن..
و بيفتوا في افراح الناس و الاحزان..
كل ده من بعد ثورة الايمان!
يا جدعان!
تكاسي مصر بئت تنائش الاديان
بتكفر اقباط و شيعة و الدين بتاع التخين ابو ودان!
يا عم حد يصلي بتسع مليون
ودم الولاد بخمستلاف و بنبوني و شمعدان!
تكاسي مصر بئت بتبرر للريس.. ائفل الساعة 10 اصل السهر للجدعان!
و احنا يا ريس اونطة.. و سيس و خرفان!
و مالها تتئطع الكهربا.. محنا بنتلكك بنفتح التكييف في الصيف و الواحد عرئان!
انا عارف انت خايف على صحة الشعب يا ريس.. دنته رئيس.. و النعمة كويس!
و زعلانين ليه السكس من النت يتئطع هوه كمان؟
هوه انتو عارفين تخشوا النت من دون كهربا و المودم عطلان؟
تكاسي مصر بئت بتشتم في المليان!
صباع حشيش و جمعة تطبيئ شريعة و زحمة الميدان!
شريعة مين يا عاطل؟
و الي مثلك عارف، قوازك من فؤادة باطل!
شبكتوا الحكومة.. و بئيتوا أرايب!
و الناس بطلت تمشي على الرصيف!
و زحمت العربيات تمشي على الخرايب!
زهقتنا في الكهربا يا مرسي من الصيف!
و خلتنا ننام و نصحى و نعرء علخفيف!
لا عطالة و لا بطالة و لا انقطاع!
وعود و كلام هايف و .. و انت مالك؟
انا مالي بصحيح.. ليه بتكلم في بلد متخصنيش؟
هي مصر للمصريين و لا لينا كلنا!
هي مصر بتاعت ابوكو لوحدكوا و لا للعالمين؟
ممنوع ازعل..
من الي بيحصل؟
و انت مالك تعترض؟
يعني عايش فيها و برضوا معاكو بننهري!
تكاسي مصر يا جدعان بئت اخوان..
ما عادتش تحط موسيقى و ام كلثوم و اسمهان!
بئينا نركب توابيت نكد
و يخطب فينا الامام شيخ التكس خطبة السكة بسهد:
بص الناس مش عاجبها جمعة تطبيئ الشريعة
عاوزين يدخلوا مصر النار
يا عم حمار
هي الدول بتخش النار؟
و الثوار شالوا فراعين علشان تتحط على ألبهم احجار؟
و الثوار دمهم راح علشان تختار فلافل و لا فول؟
انت مسطول؟
دنت شكلك عامل زي الكنافة البرم
مش اخدتوا الحكم
ليه ما راحش الظلم
ليه الناس بتتخانئ و تمسك في بعضيها
و الواحد مش عارف يخاف من الناس و لا على نفسيها؟
يا عم.. وصلت الجامعة
سلام
و عليكم السلام
Post a Comment