و قد شاهدت بلوتوث النحس

للأسف أن ما شاهدته في البلوتوث قد صدمني لدرجة تقارب صدمة علمي بوفاة الامير الراحل، لم اتوقع في حياتي ان اشهد اليوم الذي يهان فيه رمز الكويت بهذه الطريقة الفجة، و الله عيب و الله عيب و الله عيب، هالحيوان الي صور البلوتوث شنو كان يبي يوصل له.....؟!؟!؟

و ليش تؤذونه، هل لأنه مريض و لا يعلم ما هو جاري حوله، و هل هذا يعطيك الحق لأن تقوم بذا الفعل

أعرف بأننا ككويتيين معروفين بسوالف البيلوتوث و التصوير باوقات غير مناسبة كالحوادث و تصوير مراسم الدفان، و لكن ان ننزل لهالمستوى و نستغل ضعف الشيخ سعد انتقم الله لنا و له من الهمج الي صوروه بهالطريقة

اتمنى على اخواني الكويتيين يا ناس يا عالم تكفون، نخيتكم، و طلبتكم، لا تنشرون البلوتوث..... مو ناقصين و لا نبي نشوه صورة الشيخ سعد اكثر من جذي و الله حرام، اذا فيكم ذرة تقدير لتاريخه لا تكونون سبب في تلطيخها في آخر عمره بهالبلوتوث، موتوا البلوتوث، باللعنة بالصوبين بس لا تشوهون صورة ديرتنا و صورة الشيخ سعد.....؟!؟!؟

الناس برة الديرة تدور الزلة و تنطر الهفوة علشان تنتشر، و هالمرة ما هي سهلة، كنا نقول كيفهم الكويت اكبر من جذي و الكويت ما يضرها حجي واحد و لا اثنين، بس الحين السالفة غير..... الحين رمز مهم في تاريخ الكويت قاعدين يشوهونه ناس همهم الحكم و قاعدين يسيئون له و للكويت.... الشيخ سعد امير الكويت و الامير رمز..... لكن انتبهوا للجانب الانساني

ترضون لأحد من اهلكم انه يطلع ببلوتوث بهالطريقة.....؟!؟!؟

ترضون ابوكم يطلع بهالطريقة.....؟!؟!؟

انا شفته و شفت شلون ركبوا البلوتوث على اكثر من لقطة و كان واضح انه في حمار كان ينقله الحجي و مبين انه كان يعيد له الكلام اكثر من مرة و بعدها نقى احسن اللقطات الموجودة......؟!؟!؟

و الله حرام

كل هذا علشان حكم

و الله عيب، انا للحين مو قادر افهم شلون سكتوا الصباحيين و الكويتيين على هالمسخرة، الشيخ سعد كبيرنا قبل لا يكون كبير آل الصباح، شلون يسكتون عياله و شلون يسكت الشيخ صباح على هالشغلة ان لم يكن جناحه من نشر البلوتوث، و شلون يستخدم الشيخ سالم العلي و جناحه هالبلوتوث حتى لو كانت وسيلة ضغط، الموضوع اصبح عملية اختطاف لأمير الكويت، و المفروض ان ما ننزل لهالمستوى

احنا نقول انه احنا الرواد في الخليج، طيب معقولة يكون عندنا غباء سياسي و استراتيجي بهالطريقة......؟!؟!؟

سالم العلي تبيني اغششك.....؟!؟!؟

باجر خل الجلسة سرية، و خل الامير يقول القسم، و اضغط على النواب بطريقتك و تخلص المرحلة الاولى

المرحلة الثانية حل مجلس الوزراء و اترس الوزارات بربعك و شلتك و اعزل الشيخ صباح من موقعه و ركنه بالزاوية، و احكر احمد الفهد بربعة و رده للرياضة علشان تفتك من عوار الراس، و خل ولي العهد و رئيس مجلس الوزراء من صوبك و بعدين خل الامير يتنحى و ولي العهد يمسك الديرة

الشيخ صباح تبي اغششك......؟!؟!؟!؟

لا تخلي مجلس الوزرا يحضر جلسة اداء القسم، و كمل اجراءات التنحية و بعد ما يتنحى الامير روح عيد تمثيلية المبايعة و خل الكل مو بس الصباحية الكل يبوس ايدك و ريلك و خشمك و راسك مو مشكلة الكل يهون بس تبقى الكويت

و خل احمد الفهد يبوس ايدك مو مرة مرتين لأنك طلعته من محكر الرياضة، مو مشكلة خيرك غرق الديرة

ما ابي اكمل الموضوع و لا ابي اغلط اكثر لأني الحين مو قاعد اتكلم بموضوعية متنرفز حيل و ماني ناقص

بس ابي من اخواني شغلة

ابي اخواننا الي لهم صوتهم المسموع مثل مادم و زيدون و كل واحد شريف يحب هالديرة انه ما يسكت، مادم الكويت محتاجتك بهالوقت و صورة وحدة ترسمها بتغنينا عن مليون مقالة اكتبها صوتنا لازم يوصل لهم و بو جيج حتى انت بعد..... عيب الي قاعد يسووونه و عيب الي يصير بحق الكويت و الكويتيين

في النهاية ابي احيي اخواني في ساحة الصفاة و كل كويتي غيور و خل نسمعهم صوتنا