الفترة الاخيرة بينت لي امور للأسف تمنيتها لو تبعد عن اي عمل او جهد يهدف لمصلحة الكويت، او لخيرها
يفترض في كل من يحب البلد ان يضل مؤمنا و متفائلا بتحسن الاحوال و برجوع البلد الى الافضل و ان لا يفقد الامل، الكويت اهم من على الخليفة، و اهم مني و منكم، يا معودين لا تتفائلون 24 ساعة، بس كونوا واقعيين.....!!!؟
برزت في الاونة الاخيرة ممارسات بدات بخلط حب الوطن بكمية التعليقات التي ترد على موضوع البلوغ.....!!!؟
تكفون ردوا على و كتبوا "لأ" 200 مرة علشان لا اهد البلوغات، و الناس تسوي حملات و كلام ماله داعي يربط بين حب الوطن و بلوغ بيت القرين.......!!!؟
مع انه لها موضوع سابق تطلب من الناس ان لا يلومونها على عدم رد "الجميل" في التعقيب على مواضيعهم وحدة بوحدة لأنها "تقرأ جريدة 80 صفحة "......!!!؟
شخليتي حق الي يقرون 5 جرايد و تفلل........؟!؟!؟
الموضوع مو تهجم على بيت القرين، و لكنه رسالة حبيت اوجهها للكل
لا تربطون الكويت بعدد ردود مواضيعكم، و لا تساومون الناس، اذا ما تبين تكملين كتابة في بدالج العشرات فيهم الخير و البركة و البلوغرز الكويتيين ما يوقفون على واحد و الي يحب الكويت ما ينطر الناس تعلق عنده علشان يكمل.......!!!؟
خلصت كلامي......!!!؟
31 comments:
شوف انا بطلت اقرا مدونات من هالسوالف
طلعت مو وتني يا اكسزومبي
مو الوحيدة الي تسوي جذيه
يمعود اكو واحد قام يقارن نفسه بمحمد الجاسم و يقول مقلدني و اسلوبه يشبه اسلوبي
و الي يمر على زوير و عوير و يقول سلاااااااام هلااااااا الله بالخير
بس علشان يردون له التعليق
ابطال من هواء
مو ورق لا هواء و هواء ريحته تبط الراس
اولهوا على ايام نبيها ما نبيها
طلعت لنا كم وحده و كم واحد من تحت الارض و صاروا ابطال و يتكلمون باسم اهل الكويت
ديرة الطاسه فيها ضايعة و الي صوته أعلى يفرض روحه علينا كأنها صارت وصاية و احنا يهال ما نعرف نتكلم عن انفسنا
شوف الغالبية بالكويت ما يدرون عن هواء دار المدونات و الانترنت
بس في جماعة ماكو شغل و ماكو انجاز في الحياة غير هالمدونة و الكلك الي يحصله فيها
الله يشفى
هاي
مع اني كتبت لها كومنت بكلمه لأ
بس مافكرت بنفس هالتفكير
عدل كلامك
عدل
عجبني
You know what!!! I agree with you man, I thought about this and then I saw the people and said to myself “why do I think differently, what am I missing??” but wallah thank you that you stood up and said something that makes sense!!!
louis, what you said is the pure simple truth
ما ينلامون الوطن لمن قالوا يهال......!!!؟
عزيزى يمكن هذا اول تعليق لى عندى
انا من النوع اللى دائما تاخذ ارائى بطريقة سلبية لان ما يعجبنى الحال المايل
وعلقت عند الاخت الكريمة اكثر من مرة وبعدين توقفت لعدة اسباب هناك العديد من المدونين من يعمل على المهاجمة ويزيد كمية الاحباط لدي القراء
واتوقع ان احد اسباب الاحباط الموجود هو كثرة القراءة فى نفس الموضوع
رأيك فى محله
الكويت باقية وكلنا زائلون
ومشكلتنا كمدونين كثر هم من يتعاطون مع المواضيع بعنفوان زايد دون هدوء
اشكرك واشكر موضوعك
واتمنى من الناس ما تفهم كلامك خطأ لان حسن النية واضح ما بين السطور
العزيز لويس
ما تنلام، و انا لقيت ناس اهبل منها بصراحة و قلت ابي اكتب عنهم بعد بس تعرف انه خلاص هذول اصلا ما ينفع معاهم الحجي، هذول حط لهم السعدون البوذا مالهم و كل موسم عندهم بطل يديد يصارخ و يشترونه الحكومة، الناس هني عايشة الدور، و قلناها من قبل بس عمك اصمخ يزعلون من الكلمة جم يوم و بعدين و لا جنه صار شي، واحد سوالك فلم الاخوان المصريين يحاربونه و يبون يغتالونه، و الثاني يستشيرونه وكلا الوزارات، و ثالث قص علينا بفلم الموسم و نقزنا كلنا و انا واحد منهم و قمنا نتبارى منو يشوه اكثر بسمعة الديرة......!!!؟
من متى كان المنطق محكوم بعدد الردود، و من متى كان حب الوطن بانه الردود على كل موضوع فوق السبعين، هذول قاموا يكتبون رد على كل تعليق يعني وناسة و تفلسف حق الربع اليوم موضوعي صك ال70 باجر يصك 100
اختي كويتية حساوية
ديرتنا رادة احسن من قبل بالفعل مو بالحجي و الردود
Dear Someday,
thanks, and hopefully we aren't the only ones.....!!!
check my new post plz
يا جماعة نبقى اخوان
ولا تخلون سوء فهم بسيط يكبر السالفة
الاخ مشاري
خل يهاجمون و خل يفهمونه غلط، بالنهاية شنو بيصير، هل راح اسوي مقلب في نفسي و اقول راح يغتالوني ، انا اكثر واحد مؤمن بمستقبل البلوغات و تاثيرها المهم في تحريك الرأي الشعبوي و التعبوي، و لا ما تعبت نفسي و قعدت اشتغل على الفلم مال البلوغز، و لكن هل هذا يعني اني اجامل.....!!!؟
اكيد لا، الضحك على الذقون و الخداع صار اشكرة عيني عينك نفس بوقات الناقلات و نفس الفساد الحكومي و النيابيو نفس التهتك الي صار في مختلف الاصعدة في الكويت، و لكن علشان نكون واقعيين، مشكلة الكويت في منو، بال الصباح، بالدستور، بالحكومة و ادائها بالنواب، و لا فينا كشعب اي واحد راح يرفع اصابع الاتهام لركن من اركان الفساد، و لكن الحقيقة انه احنا كلنا مشاركين فيه، انا وصلت بوذا البلوغات للمجلس بعدم تصويتي في الانتخابات السابقة، و هو كجزء من روحانيته مارس صلاحياته كنائب على الوجه الاتعس، و شفنا منه و من باقي صفوة نواب نبيها خمس اسوء مراحل الحركة البرلمانية في الكويت، صحيح في اوجه و احداث استثنائية، و لكنها تعتبر استثناء ليس الا و هذا واجب على النواب و ليس طيب منهم، و الحكومة الضعيفة و رئيس وزرائها الاضعف، ثم الراس العود الي للحين ما تحرك و نفض الديرة من الغبار الي عليها، و مع هذا و الله قاعد اقول انه ديرتنا احسن ديرة بالعالم، احنا الوحيدين الي تعليمنا للجامعة مجاني و ندز على حساب الدولة مواطنينا للسياحة العلاجية في الخارج، و نعطي المعاشات للي يشتغل و الي ما يشتغل، و لك وظيفتك و لك كل شي تبيه، زواج و يعطونك عليه فلوس، و ان يبت عيال صرفوا لهم فلوس، و غيره وايد، بس احنا ما يعجبنا العجب، و لا نرضى هم بعد و هذا مو شي سيء مرة وحدة يعني نبي الخير لأهلنا و للكويت و انشاء الله بتصير
صاحبتك تبي الشاره؟؟؟
مسويتلك بوست يديد
اشعللللللييييييييك
صرت منهم
قلنالك صير وتني
وتني كويت سلمت لي المجد
Ouch!
!بالصميم
لا ادري ما هو الهدف من هذا الموضوع ؟!
مدونة بيت القرين تعمل بجهد وتابعنا مواقفها بالكثير من القضايا ولها مصداقية كبيرة , وعلى ذلك ما المشكلة ان رفعت شعار حملة هل نحن ملزومين بالتعليق او بالدعم ام اننا احرار ؟
وهل الردود تعبر عن ارادتنا ام ان القضية كلها ضحك بضحك ودعاية ؟
وهل نحن ملزمين ايضا بزيارة مدونة بيت القرين و قراءة مواضيعها ام اننا احرار ؟
الى متى ستستمر معكم عقدة الدعاية من اجل الدعاية والى متى لستم قادرين على تلمس اهمية تقارب الناس ومحاولاتهم حتى ان كانت بسيطة لتوحيد الصفوف ؟
ام انكم سعداء بواقع الناس وبعدهم عن الوحدة امام الفساد والخراب اللي قضى على كل شي جميل بالكويت ؟؟
تحياتي
السلام عليكم
كل واحد يعبر عن حبه للكويت بطريقته الخاصه , صحيح ان احيانا تكون هذه الطريقة تظهر بشكل خاطيء او تكون للبعض انها دعاية , لكن لنأخذ الفكرة الاساسية لموضوعها بدون الرتوش وبدون كلام الدعاية اللي انت تشوفه , هل فكرتها صحيحه او خطأ ؟؟؟
هل هناك فئة من الناس لهم هذا التفكير ؟؟
نقول نعم فيه ناس تستهويهم هذه الطريقة الحماسية وفيه ناس تستهويهم الطريقة العقلانية الهادئة
ليكن حب الكويت يجمعنا وان نحاول ان نفهم بعضنا البعض بشكل اكثر
لك مني كل تحية واحترام
عن نفسي من زمان من زمان اتابع بيت القرين وافتخر فيها كونها مدونه وفكر كويتي , رغم اني عمري ماعلقت على اي بوست لها وحاط لها لنك واستدل فيها بكثير من الامور السياسيه كونها فكر واعي وواقعي
لكن لو فعلا كانت جاده بـ هالشي فالكثير الكثير راح يحرصون على بقائها تكتب ! للكويت تتكتب !!
اللي متابع بيت القرين وعارف اسلوبها بالكتابه يقدر يميز بين الدعابه وبين ماتصورته انت !!
ومو مهم اللي كتبته كون الاسلوب غرضه الرئيسي ايصال فكره معينه
المهم هل وصلت الفكره والا لأ !؟
وبالاخير نجتمع على حب الكويت
مو على تعليق !!
واكيد العقول اكبر من جذي :)
قواك الله
المسألة واضحة ، الزميلة ترغب بصرخة شعبية حيال تلك الممارسات الخاطئة التي تحدث في البلد ، ما كانت ترمي إليه "لأ من أجل الوطن" وليست "لأ من أجل بيت القرين"
فكفانا الاصطياد في المياه العكرة :)
تحياتي
الناس ما تتقبل يا خوي
ومالك شغل فيهم هذيل شوية خرفان يحبون يلحقون الصيحة وين
واذا كنت مقتنع في رأيك اثبت عليه لان مو مهم تكون مع الكثرة المهم تكون مقتنع برأيك
بااااااااع
200
خروف يقودهم شاوى واحد
و راعي الحلال حاط ريل على ريل و متطمن على حلالة
بعد أذن اكزومبى
و من هذة المدونة المباركة
أعلن انطلاق حملة الميتيين وواحد باع
و اذا ما وصلت التعليقات 201 بنبطل تدوين
قلها بقوة...
اشعر بها...
تخرفن و سلم عقلك و استمتع بالحياة...
بااااااااااااااااااااااااااع
بصراحه يا اكزومبي مادري من وين ابدي
للأسف فها انت تتخذ مبدأ خالف تُعرف
اذا الاخت في مدونة القرين قد استخدمت اسلوب حماسي مما ضننت انت و مؤيدينك انه غلط و ضننتوا يهم سوءً فدعني اقول لك هذا
في البدايه بيت القرين مدونه غنيه عن التعريف ليست واقفه عليك ولا على باقي الناس
يعني اذا ارادت بيت القرين استكشاف الساحه لمعرفة من هم يردون الوقوف بحملة لأ فهذه طريقه سليمه جداً
و سأرجع بك الى التاريخ
عندما بدأت حملة نبيها 5 و برأيي انك لا تستطيع نكر هذه الحقائق
و في تلك الايام كان هناك بشر لا تعي العمل الجماعي كشخصك انت و مؤيدينك
الا ان اثبتت المدونات ثقلها الحقيقي بالساحه و تأثيرها على كلا السلطتين التشريعيه و التنفيذيه عندها تم اقرار الدوائر الخمس كذلك حصل بحقوق المرأه السياسيه
لذا يجب عليك على الاقل الرقي بالطرح و اتخاذ الاجراء اللازم لكل من قال " باااع" بمدونتك
و على ما اظن انك تستطيع مسحه
فنحن الان نعيش تحت سقف واحد أي كل المدونين عباره عن اخوه يجمعهما حب الوطن ولا نريد بيوم من الايام ان يكون هناك اطفال تلعب بالمدونات و تجرح الاخرين و تسيء فهمهم .. كافي عندنا ضيف الله بورميه و شاكلته بالمجلس
وهم غير مرحب فيهم في عالم المدونات
فقد كتبت لك و كلي امل على ان تهدئ و تكبر عقلك قليلأ
ولك مني كل احترام و تقدير
يعني يا نأيد رايك يا نطلع يهال؟
الاخ فتى الجبل
ان كان سوء فهم فانا اعتذر و لكن الكلام كان واضح و ما اظن انها غلطت بالتعبير لما قالت كتبوا الميتين و لا اوقف الكتابة.... اهي ما قالت كتبوا الميتين حق الكويت الا في الدعايات الي كانت تدزهم للناس........!!!؟
العزيز لويس
الردود هناك عجيبة، في ناس كاتبين هناك تعليقات يردون فيها على نفسهم اكثر من ما اهي عن الي كتبته.....!!!؟
الفضائي
ما اظن وصلت الفكرة
و انا بسوي حملة الالف صوت، اذا وصلت الردود عندي الف راح اوقف البلوغ.....!!!؟
الاخ حمد
اخوي انا ما اتكلم عن الجهد فهي تشكر عليه، و لا انا الي اشكك بالوطنية و لا اهو دوري اصلا، و المصداقية ليست موضوعنا معاها، و لكن الله عطانا عقل، فلم لا نفكر فيه قليلا، اتمنى لو تقرون ما كتبته هي، و شوفوا الخلط بين امرين، فهي طلبت 200 تعليق حتى لا تتوقف، ثم لزقت حب الكويت بالتعليقات......!!!؟
شلون هذول يركبون، مشكورة اهي على مجابلها لجريدة الوطن، و حملاتهم و خلافه، لكن الي يحب الكويت ما يتشرط في البذل، و لا يقول عطوني......!!!؟
انت حر تسوي الي تبيه مثل ما انا حر بطرح رأيي بأي موضوع اراه، هذه حرية الانترنت
انا اقول لك ثلاث ارباع الناس الي صوتوا هناك ما كانو يدرون شحقة او على شنو مصوتين، و كانو مع الخيل يا شقرا......!!!؟
بعدين كتبتلي فقرتين ما اظن قاعد تكلمني فيهم.... فما ادري ارد على النقاط الي متكلم عنها و لا لا.....؟!؟
الاخ واحد كويتي
كل الي قلته انا اتفق معاك فيه، و الفكرة الرئيسية كلنا من غير ما نقول "لا" متفقين عليها، و ما اظن في احد بالكويت عاجبته حفظ القضية و كنا نتمنى ان تكون هنالك ادانة.. و لكن ما صار الي نبيه
تحياتي لك و شكرا على الطرح
الاخ لاخطاوينا
كلامك على العين و الراس، لكن خذ الحق من نفسك و قول لي منو الاهم الكويت و لا انا.... الكويت و لا اهي، اذا اهي وقفت لأي سبب كان، راح اييون غيرها الي فيهم البركة انشاء الله و يكملون المشوار، و الشباب الموجودين ما وقفوا في يوم من الايام و شرطوا مثلها انه ردوا على مواضيعي و لا ما راح اكتب مرة ثانية "علشان الكويت"......!!!؟
المشكلة انه الكثيرين على بالهم هذي اول مرة ادش فيه بلوغها، انا متابع لبلوغها، و اهي تقدر تشوف هالشي اذا شيكت جم واحد من الاردن يدشون بلوغها......!!!؟
و كنت اشوف في كل موضوع تكتبه تقريبا في نقزة او تلميح او قطة اشكرة انه ردوا علي و زيدوا تعليقاتي، و هذا مو بس عندها و لكن حتى لما تعلق عند غيرها، انا مو قاعد اتصيد، و لكن هي خلطت بين حب الكويت و استمراريتها و شتان ما بين الامرين.....!!!؟
و انا قلت رأيي ليس الا.....!!!؟
يعني لو اكتب موضوع اقول فيه الي يحب الكويت بس يكتب عندي، هل هذا منطقي او واقعي......!!!؟
فما بالك لو صدق الناس هذا الفعل و عملوا به، و سوا حملات انترنتية واسعة عليه، و الكل قام يعلق بس عندي علشان يثبت وطنيته او حبه للكويت، بالذمة مو راح تحس انه في شي غلط او انه هذول مو متأكدين من حبهم للكويت......!!!؟
بالنهاية اتمنى لو اكون مخطيء في ما قلت، و انشاء الله العقول اكبر من جذي
تحياتي لك و شكرا
وقار
اعتقد احكام اللغة العربية و قواعدها واضحة و لغتنا لا تعطي مجالا كبيرا للتأويل فيما اوردته الاخت قماشة.....!!!؟
ان كانت ترمي لـ"لأ من أجل الكويت" فكان من الاجدر ان تقول "لا من اجل الكويت"، و ليس لا عشان ما اوقف كتابة حق الكويت......!!!؟
المجهول
انا متكلم عنها لأني ابي الشهرة، و انا اخونجي، و من مشجعي جريدة الوطن، و احب على الخليفة و و و و .... يا اخي منطق الناس غريب، و اذا اهم عبالهم بخق و لا بجامل فهذي مشكلتهم
بو مريوم
عاد امس سائل الي يسوي حق اصابيعه باديكير و مانيكير عنك، وينك يا القاطع، و شصار على الحلوي الاسرائيلية......؟!؟!؟
ابيك تقول لي منو الشاوي و منو راعي الحلال بالضبط......!!!؟
هههههههههههههههههههههه
التعليقات على موضوع ما توقف عدت 220
ابيك تسوي لي دعاية على حملتي: 1000 صوت لإيقاف اكزومبي عند حده......!!!؟
بس تتوقع اوصل الرقم و لا لا.....؟!؟
الاخ خرواش
اذا كان الهدف اني اعرف، او انشهر جان شهرت نفسي من 3 سنين مو ايي الحين و ادور شهرة،و اللعبة علشان اصير مشهور معروفة و سهلة يا عزيزي، ثم ما هذا المنطق الاعوج، الي ما يمشي على هواك يعني ضدك و عدوك.....!!!؟
بعدين ما ادري انت شلون تفكر فيه
"يعني اذا ارادت بيت القرين استكشاف الساحه لمعرفة من هم يردون الوقوف بحملة لأ فهذه طريقه سليمه جداً "
استكشاف شنو و خرابيط منو الي قاعد تقص على روحك فيها، رفضنا للسرقة من المسلمات، و حنقنا على ما حدث من البديهيات، و لا نحتاج لإستكشاف حتى نعرف بأننا ضد ما حدث، بعدين الحملة ماشية من اغلب البلوغرز و ليست حكرا لبيت القرين حتى تتشرط و تساوم الناس.....!!!؟
يعني ليش ما اشترط عاجل و لا مطقوق و لا شروق شروطها......؟!؟
و هذه الطريقة سليمة اذا انت تمشي بحقل الغام، و ليس حملة تعبئة شعبية ضد الفساد.....!!!؟
ضحكتني بسالفة التاريخ
اول شي من وين يبتلي هالنكتة هذي: "في تلك الايام كان هناك بشر لا تعي العمل الجماعي كشخصك انت و مؤيدينك"
اول شي انا كنت مؤيد لنظام الدائرة الواحدة، و لإيماني بالعمل الجماعي ايدت تقليص الدوائر الى خمس، في تلك الفترة لم اكن موجود في الكويت ايام الاعتصامات علشان اسجل حضوري او استلم منك صك الوطنية، و لكني كنت مؤيدا للشباب و معهم، و بعدين لو انا ما افهم بالعمل الجماعي جان ما تطوعت للدفاع عن الكويت قبل ما تعرفون شي اسمه بلوغات.....!!!؟
اتمنى انك ما تفتي من عندك ولا اظن بان العمل الجماعي او الوطني وكالته عندكم تحتكرونه لنفسكم دون غيركم.....!!!؟
بو مريوم ابخص بما كتب و انا ما اشيل اي شي يكتبه، و لا اظن بان بلوغر بو 3 شهور راح يعلم بو 3 سنين شنو يكتب و ليش على هواه، لك حرية قول كل ما لديك و لي حق الموافقة او المعارضة، فنحن لسنا خرافا نساق كما القطيع،
اخي الكريم، انا لا اجاملك و غيرك، لما اشوف شي غلط راح اقول لك هذا غلط، سواء لك و لا لقماشة أو لأي شخص كان، الموضوع مو عصبية و غضب او حقد و غيرة.....!!!؟
و بعدين بو رمية و غيرهم الانترنت مفتوح لهم، و ليس حكرا لنا، فلا نحن اشتريناها بفلوسنا و لا هي ملك ابونا علشان نمنع الناس عنها......!!!؟
تحياتي و احترامي لرأيك و لشخصك اخي الكريم
الاخ بو صالح
انا قلت ما ينلامون، و بصراحة وصلتني ايميلات من جم واحد اقل ما اقدر اقوله عنهم انهم يهال، في ناس تدافع و هي ما تدري شنو قاعدة اتكلم عنه او ليش سويت هالشي او ليش اتخذت هالموقف
انا ضد الفساد بأنواعه، و ضد الحرامية و ضد نفسي بعد لو اشوف انه من صالح الكويت، جلد الذات و نقد انفسنا واجب علينا اذا احنا نبي الافضل للديرة، ليش اجامل احد اي كان و اسوي شي من ولا شي
تبقى عزيز و غالي و لك مطلق الاحترام
اعتقد كلامك و ردك بمدونة بيت القرين يكفون و يوفون
و انا من الناس اللي فهمت قصدك بالتعليق على اللغط و الخلط بين حب الكويت و الاعتزال عن التدوين ،، فنحن لسنا الا اجساد زائلة و الكويت كيان باقٍ
" اذا ماوصلت التعليقات بهالكلمة الى 200
ماراح اكتب بعد
ابي الكل يسمع
لا تبخلون على الكويت رجاء
Posted by بيت القرين at 12:24
"
اعتقد هذا بيت القصيد، و لكني استغرب الهجوم المستبسل عليك! و تصنيفك بتصنيفات مغايره للواقع
اللي انا اعرفه انك كويتي و ماكو اي انتماء اكبر من الكويت! فلا انت من اليمين ولا من اليسار ولا من العلمانيين ولا اللبراليين ولا سلفي ولااخوانجي ولا شيعي ولا سني
(لا يخطر ببالي تصنيفات أخرى الآن و لكن لطفاً اذكروها عني و اشملوها! لاني لا احب ان يقال باني اتبع اي من التصنيفات المذكورة و الغير مذكورة و اخشى ان يُعتقد بان الغفلان عن البعض متعمد!)
ولست على حد علمي من متبعي الغير ولا من المزايدين على وطنيتهم او مانحي صكوك الوطنية،، انت ببساطة كما ارى مدون كويتي و بس
مو من حق اي احد يحكم عليك او يصنفك على مشتهاته بس لانك عبرت عن رأيك ،، لانكم بذلك يا سادة
"اقصداللي صنفوك على كيفهم و حطوك بلحية و عاشق لجريدة الوطن و طالب لشهرة و تبي دعاية - فكرة عارضة:انت مخطط تنزل المجلس؟ -"
إن كنتم ممجدين للراي الحر فبعد بعد هذه التصنيفات اصبحتم طغاة ولا تتقبلون الرأي الآخر ،، فإما ان يكون معكم او لا؟
انا من المدونين الخاملين و اللي ما اوااااااطن السياسة!! والمتابعين الصامتين عموما للمدونات الكويتية بس هاللغط اللي حصل و المزايدات اللي صارت بهالموضوع ما اعتقد لها داعي
واعتقد بالمقالة اعلاه قلت
"تكفون ردوا على و كتبوا "لأ" 200 مرة علشان لا اهد البلوغات، و الناس تسوي حملات و كلام ماله داعي يربط بين حب الوطن و بلوغ بيت القرين.......!!!؟"
يعني واضح انك ما تبي الربط بين حب الكويت و بلوق القرين و استمرارية الكاتبه فيه
"الموضوع مو تهجم على بيت القرين، و لكنه رسالة حبيت اوجهها للكل
لا تربطون الكويت بعدد ردود مواضيعكم، و لا تساومون الناس، اذا ما تبين تكملين كتابة في بدالج العشرات فيهم الخير و البركة و البلوغرز الكويتيين ما يوقفون على واحد و الي يحب الكويت ما ينطر الناس تعلق عنده علشان يكمل.......!!!؟ "
اعتقد مقالتك شارحه روحها لكني اتمنى ان الناس تقرا المقالة عدل و تفهم فحواها و لا تتكهن
بالاول و الاخير كلنا كويتيين ،، و الوعي للقضايا اللي حولنا شيئ ظروري و مهم لاستمرار الكويت و توعية الاجيال القادمة بالذات بان الوسيط بينا "المدونات و الانترنت" اداة يستخدمها صغار السن و هم مستقبل الكويت
EXz :
اللي خلى بومريوم يرد للتعليق بالمدونات قادر على أستفزاز بوجيج للعودة لعالم المدونات
طلعت مو سهل
: )
الرفيقة الاشتراكية شيقي
احرجتيني بردج، و اخر فقرة ذكرتيها ترى ضربت على الوتر
تحياتي
اخوي المجهول
هههههههههههههههههههههه
اعتقد انا اخر واحد يقدر يقنع بوجيج يرد يكتب، يمكن علشان نجرة موضوع الطبقية الي من بعده وقف شوي، بوجيج من البلوغرز العزيزين علي، و الي يحزنني توقفهم عن البلوغات و انا اعتبر انه اهو و جم بلوغر ثاني المفروض ما يوقفون، لأنهم اصبحوا جزء مهم.....!!!؟
ما نبي ابو حفص دودكي ثاني، و لا نبي ماد ام غير ماد امنا، و انشاء الله يردون كلهم بدون استثناء لأنهم اثروا فينا كلنا بكتاباتهم و رسوماتهم، و على طاري بومريوم انا ماخذ ربابته علشان جذي قاعد يرد........!!!؟
تحياتي
الاخ الكريم خرواش
العمل الشعبي الجماعي لم يبدأالا من حملة نبيها خمس؟:)
وين العمل النقابي قبل الغزو و ابطالة مثل ناصر الفرج
وين ديوانيات الاثنين
ووين اعتصامات جامعة الكويت
نبيها خمس كانت بداية العمل الاستخرافي
و شوف مواقف النواب اللى وقفوا بالحملة يوم وصلوا المجلس..
قانون عمل المراة و موقف الراشد كمثال
اما سالفة حب الوطن ف لاعت جبدنا من توزيع صكوك الوطنية
و الشى اللى يقهر صج المزايدة بصور الاسري و ربطهم بصراعاتنا السياسية
:) عجبني ردك على البوست اللي كاتبته بيت القرين عنك
:) موفق
لول خوش بوست
انا صوت عندها علشان لازم الكل يكتب وما يوقف كتابه حتى لو اختلف معاها
عادي مدونتها وكيفها
her own free space
صج يعني فاتحة مدونه بس ترد على جريدة وحدةومواظيعها بايخة وتنقال في قعدة بنات بس ميخالف خلها في ناس تحبها ليش لا
عموما حتى اذا انت بتسكر البلوق راح اكتب لك 200 تعليق علشان الاكس زومبي
يرد زومبي اصلي
good luck :)
احترم ردك ووعيك الصراحة تشرفت بمعرفتك
صح لسانك بومريوم
الحساوية
تسلمين و موفقين كلنا انشاء الله
اخت نجلة
اتفق معاج و اشكرج على كلامج الطيب، بس حملتي غير انا حملتي الف صوت علشان اوقف.......!!!؟
الاخ مشاري
شكرا لك و انا الي لي شرف التعرف عليك، و خوش مقالات قريتها لك
تحياتي
اشكرك على تحملك نتائج البوح برأيك
اليوم حنا في الكويت اللي يقول كلام عكس التيار يتهم بالانتهازية والعمل ضد الصالح العام
الغوغائية هي المد العام حاليا والصراخ والاتهامات هي المعيار
اشكرك على وطنيتك وعلى كشفك لتفاهة البعض
تحياتي
Post a Comment